Bwrlwm yr ifanc yn Aberystwyth

Braf oedd gweld llawr capel Seion ar y bore Sul hwnnw yn llawn, a chymaint o blant ac ieuenctid y cylch wedi dod at ei gilydd i arwain y mawl. Thema’r oedfa oedd Cyfri dy fendithion, cofia gariad Duw (sef cwpled allan o gân i blant yn y llyfr newydd, Caneuon i Bob Ysgol). Cymerwyd rhan gan aelodau ysgolion Sul Bethel, Talybont; Noddfa a’r Garn, Bow Street; Horeb Penrhyn-coch; Bethel, Aberystwyth, yn ogystal â Seion, Stryd y Popty. Cafwyd darlleniadau, gweddïau, deuawd cerdd dant, meim yn seiliedig ar stori’r Samariad Trugarog a sgets ar ostyngeiddrwydd ac ar y Wir Winwydden. Cafwyd hefyd neges gan y Parchg Andrew Lenny, ar gyfri’r gost – neges wnaeth ein hatgoffa fod ein rhoi ni ond yn efelychiad gwan o aberth mawr y Groes. Roedd brwdfrydedd ac afiaith i’w glywed hefyd yn y canu cynulleidfaol ac yng nghyfeiliant y band. Dyma oedd Sul nodedig iawn, a’r cyfan yn fodd i ddyrchafu enw’r Arglwydd Iesu Grist.