Undeb : Dewch a'r milwyr adre

Ar yr union adeg yr oedd Undeb yr Annibynwyr Cymraeg, yn ei gyfarfod blynyddol yng Nghaerfyrddin, yn galw am dynnu byddin Prydain o Afghanistan, daeth y newyddion mai milwr o’r dref honno oedd y diweddaraf i’w ladd yn y rhyfel.

"Wrth alw ar lywodraeth Prydain i ddod a’r milwyr adre, allan o gonsyrn dros y gŵyr a’r gwragedd sy’n cael eu lladd yno, fe ddangoswyd wynebau’r 312 o filwyr Prydeinig a fu farw hyd hynny ar fur fideo'r gynhadledd," meddai Dr Geraint Tudur, Ysgrifennydd Cyffredinol yr Undeb.

"Erbyn diwedd y dydd, byddai wyneb gŵr ifanc o Gaerfyrddin, Samuel Robinson o Fronwydd, i’w ychwanegu at y galeri drist honno. Mae’r sefyllfa’n dorcalonnus."