Datblygu
Y Rhaglen Datblygu
Wedi i Raglen Genhadol AGAPE ddod i ben, aeth yr Undeb ati i drefnu rhaglen newydd a fyddai'n gloywi ein tystiolaeth fel Annibynwyr, yn paratoi eglwysi ar gyfer cyflawni eu cenhadaeth, ac yn rhoi hyder i ni fedru rhannu'r ffydd yn effeithiol trwy ymestyn allan i'n cymunedau.
Yn Undeb Abertawe (2008), lansiwyd 'Rhaglen Datblygu Annibynwyr Cymru' a chyhoeddwyd y byddai nawdd ariannol ar gael gan CWM hyd ddiwedd 2013. Wedi dweud hynny, ystyrir y Rhaglen yn brosiect hir dymor gan yr Undeb, un fydd yn ymestyn ymhell y tu hwnt i 2013.
Yn sylfaen i'r rhaglen, mae chwe thema greiddiol:
1. Llunio Rhaglenni Datblygu ar gyfer eglwysi unigol
2. Codi Arweinyddion o fewn yr eglwysi
3. Sefydlu neu gynhyrchu adnoddau i alluogi eglwysi ac unigolion i gyflawni eu cenhadaeth yn fwy effeithiol
4. Sefydlu prosiectau fydd yn galluogi eglwysi i ymestyn allan i'r cymunedau sydd o gwmpas eu capeli
5. Addysg a Hyfforddiant, sef, cyrsiau ffurfiol ac anffurfiol o bob math ar gyfer aelodau ac arweinyddion eglwysi
6. Rhaglenni Datblygu ar gyfer Cyfundebau, i'w galluogi i wneud eu gwaith yn well
Dyma'r Llawlyfr: LLAWLYFR Y RHAGLEN DATBLYGU
Lluniwyd y rhaglen wedi misoedd o ymgynghori gydag eglwysi, gweinidogion, aelodau eglwysi, unigolion a phartneriaid eglwysig o fewn Rhanbarth Ewrop CWM. Dim ond wedyn y cyflwynodd yr Undeb gais ffurfiol i CWM am arian i'w gweithredu.
Fel rhan o'r Rhaglen, bydd cyfle i eglwysi a Chyfundebau ymgeisio am nawdd ariannol ar gyfer prosiectau a gweithgarwch.
