Dinasyddiaeth Gristnogol
Enghreifftiau o weithgarwch yr Adran:
HIV/AIDS: 42 miliwn wedi’u heintio; 41,000 yng ngwledydd Prydain. Beth yw rôl yr eglwys? Beth yw dyletswyddau arweinyddion eglwysig? Penodwyd y Parchedig Christopher Owen yn Gysylltydd CWM ar HIV/AIDS. 1af Rhagfyr yw Diwrnod AIDS; cyfle i bob eglwys ganolbwyntio ar effaith yr haint ar ein bywydau a’n cymunedau.
Ceiswyr Lloches: Pan ddaeth ceiswyr lloches i sylw’r cyhoedd cafwyd ymdeimlad greddfol nad oeddem i’w trin yn ddirmygus. Di-sail yw’r gred bod niferoedd y ffoaduriaid yng Nghymru yn uchel; yng ngwledydd tlota’r byd y ceisia 75% ohonynt loches. Bu’r Parchedig Aled Edwards yn trefnu ymweliadau ceiswyr lloches i Gyfarfodydd Cyfundebol.
Caethwasiaeth: Er diddymu caethwasiaeth yng ngwledydd Prydain yn 1807 mae caethwasiaeth y diwydiant rhyw, llafur plant a chyffuriau yn dal i chwarae rhan arswydus ym mywydau cymaint o’n cyd-drigolion, yng Nghymru ac ar draws y byd. Wrth ddathlu’r diddymiad byddwn fel Adran yn ceisio sicrhau bod ein heglwysi yn ymwybodol o’u dyletswyddau i ymdrin â’r hyn sy’n digwydd yn 2007.
