Newyddion Ebeneser Llanfair PG

Bu’n gyfnod prysur yn eglwys Ebeneser Llanfairpwllgwyngyll, dyma beth o’r hanes.

Ffarwel – am y tro

Fore Sul yng Ngorffennaf eleni, cawsom fel eglwys gyfle i ddweud ffarwel am y tro ag un o’n haelodau ffyddlonaf ac anwylaf, Miss Wendy Davies. Mae Wendy wedi penderfynu symud i fyw i Ffair-fach, Llandeilo er mwyn bod yn agosach i’w theulu. Daeth Wendy atom fel aelod rhai blynyddoedd yn ôl a bu’n fwy na pharod i gyfrannu tuag at a chefnogi holl weithgareddau’r capel.

Wedi’r oedfa, daeth pawb ynghyd i’r festri am baned (a dishgled i Wendy) a chawsom gyfle i glywed gair o ffarwel gan un o ddiaconiaid y capel, Derec Owen. Diolchodd yntau ar ran pawb am gyfeillgarwch a chyfraniad Wendy dros y blynyddoedd gan ein hatgoffa ei bod wedi gadael y rhan fwyaf o’i llyfrgell bersonol i ni fel capel. Yna, fe gafodd Wendy gyfle i ddweud gair ac fe ddwedodd ei bod yn trysori’r blynyddoedd y bu gyda ni a bod ganddi atgofion lu am achlysuron mawr a mân, rhai llawen a rhai dwys a diolchodd i bawb am eu cwmnïaeth a’n gofal ohoni.

Dymunwn bob bendith i Wendy yn ei chartref newydd.

Te pnawn

Ddydd Gwener, 14 Awst, cynhaliwyd te pnawn yn festri Ebeneser, er budd ymchwil cancr y fron (Breast Cancer Now).

Ysbrydoliaeth Eluned Mason, un o aelodau Ebeneser, oedd cynnal y te yn wreiddiol ond yn fuan roedd nifer o ffrindiau, teulu a chyd-aelodau o’r capel yn rhan o’r bwrlwm. 

Gyda nifer o’r criw yn hen gyfarwydd â chegin y festri, daethpwyd ynghyd i gynnal te gwerth chweil mewn awyrgylch braf a hwyliog. Roedd y festri dan ei sang a chyda criw cerdded lleol yn taro i mewn am 11:00, bu’r criw gweini a golchi llestri wrthi’n ddi-stop tan ddiwedd y pnawn.

Cafwyd hwb dda i gychwyn y casglu gyda rhodd o £500 gan y capel, arian a gasglwyd trwy gynnal cyngherddau dros dymor y gaeaf y llynedd ac a glustnodwyd i’w drosglwyddo i elusen deilwng. Cafwyd rhoddion hefyd trwy wefan Justgiving.com, a da yw cael dweud fod dros £2,100 wedi ei gasglu erbyn hyn i’r achos teilwng hwn.

Dymuna Eluned a’i ffrindiau ddiolch i bawb a gyfrannodd mewn unrhyw ffordd tuag at yr achlysur arbennig yma.

Irfon Morris