Taith llawn hwyl a phwmpenni
Mwynhaodd dros 180 o blant a rhieni ysgolion Sul Gofalaeth Bro Nant Conwy ddiwrnod gwych o hwyl yr hydref yn fferm Monarafon ar gyfer trip blynyddol yr ysgolion Sul. Roedd y diwrnod yn llawn cyffro, chwerthin, a digonedd o bwmpenni wrth i’r plant archwilio’r fferm, cymryd rhan mewn gweithgareddau tymhorol, a dathlu ysbryd y gymuned. Roedd yn galonogol gweld cymaint o deuluoedd yn dod ynghyd i wneud y diwrnod yn un arbennig. Mae digwyddiadau fel hyn yn ein hatgoffa o’r llawenydd sy’n deillio o gymuned, cysylltiad, a phrofiadau a rennir o fewn gweithgareddau’r Eglwys. Diolch enfawr i fferm Monarafon ac i bawb a helpodd i drefnu’r daith – rydym eisoes yn edrych ymlaen at yr antur nesaf!
Diwrnod Hwyl
Ar ddydd Sadwrn, 11 Tachwedd cynhaliwyd Diwrnod Hwyl ar gyfer plant ysgolion Sul, Henaduriaeth Conwy a Dyfrdwy. Trefnwyd y diwrnod gan y Parchg Owain Davies ar ran Pwyllgor Plant ac Ieuenctid yr Henaduriaeth. Daeth nifer dda o blant blwyddyn ysgol 3 i 6 yno gan gynnwys plant ysgolion Sul Undebol Hebron, o ofalaeth y Parchg Helen Wyn Jones ac ysgolion Sul Cylch Llanrwst o ofalaeth y Parchg Owain Davies. Dechreuodd y diwrnod wrth ddal y bws o Glasdir, Llanrwst i Goleg y Bala. Cafwyd croeso cynnes a byrlymus iawn gan aelodau staff y coleg ynghyd â’u harweinydd a’r gweithiwr ieuenctid, Siôn Morris. Trefnwyd amrywiaeth o weithgareddau hwyliog gyda neges yr Efengyl yn ganolbwynt i’r cyfan. Cafwyd storïau o’r Beibl gan gynnwys hanes y dyn cyfoethog, chwaraeon, crefft a ffynnon siocled, a’r cyfan am ddim. Mae ein diolch i’r Henaduriaeth am ariannu’r diwrnod. Cafwyd cinio blasus a llawer mwy i’w fwyta! Roedd yn gyfle gwych i’r plant gymysgu a dod i adnabod ei gilydd. Yn ystod y dydd roedd y plant yn dditectifs yn chwilio am gliwiau i ddod o hyd i adnod Ioan 3:16 o’r Beibl. Dangoswyd fideo o Goleg y Bala i’r plant er mwyn codi ymwybyddiaeth ac awydd i’r plant ddod yno i aros a derbyn mwy o brofiadau arbennig. Roedd yn amlwg bod y plant wedi mwynhau a dysgu mwy am gynnwys y Beibl, a hyn mewn ffordd hawdd iddynt ddeall. Y gobaith yw bod hadau wedi eu hau yn y plant ar gyfer y dyfodol a’r ôl iddynt dderbyn diwrnod bendithiol iawn yng nghwmni ei gilydd. Mae ein diolch yn fawr i staff y coleg am eu croeso ac am drefnu’r holl weithgareddau.
Clwb CIC Hadau Bach
Braf oedd gweld gymaint o deuluoedd yn mynychu ein Clwb CIC Hadau Bach cyntaf bore dydd Sadwrn 22 Tachwedd. Mae Gofalaeth Bro Nant Conwy wedi cychwyn y sesiwn newydd yma i blant ifanc a’u rhieni er mwyn rhoi cyfle iddynt gymdeithasu, chwarae a chanu gydag Alaw Tecwyn Sion. Cafodd y plant lawer o hwyl yn chwarae, lliwio a chanu. Diolch arbennig i Alaw am arwain y canu hwyliog. Bydd y sesiwn yma yn rhedeg unwaith y mis yng Nghanolfan Hamdden Dyffryn Conwy. Edrychwn ymlaen at weld pawb unwaith eto yn y flwyddyn newydd.
Diolchgarwch
Cynhaliwyd gwasanaeth o ddiolchgarwch yn eglwys Hafan Ifan ar 9 Tachwedd a oedd o dan ofal Ffermwyr Ifanc Rowen, Llanrwst ac Ysbyty Ifan. Mae gwasanaeth o ddiolchgarwch fel hwn yn adlewyrchu cryfder cymunedol ac undod rhwng clybiau ffermwyr ifanc yr ardal. Diolch i arweinwyr y clybiau am eu cymorth gyda’r trefnu ac i’r bobl ifanc am eu hymroddiad. Diolch arbennig i Elin Angharad a fu’n cyfeilio yn ystod y noson.
Mae’n hyfryd gweld pobl ifanc yn cymryd cyfrifoldeb, yn rhannu eu doniau, ac yn creu awyrgylch cartrefol sy’n llawn bendith.
Owain Davies
